بلنه

اسدالله زمری

بلنه

         ځي چې له وطن نه رنګ په رنګ غمونه وریبو

                                               څه چې مو کرلی دی هغه فصلونه و ریبو

         پاکې ارادي او نیکې هیلې که سر خوره شوې

                                               ځې چې د ناولو سر خورو، سرونه و ریبو

         کله د چا لاس، کله پښه او کله سر غوڅ دی

                                               دې د ژوند لوګرو نه خوني لاسونه و ریبو

         هر یو د خپل پلار او د نیکونو دعا ګویه کړو

                                               ځي د کفن کشو د دوران، وختونه و ریبو

         هر څوک وائې ځه په ما ئې څه؟ ما هر څه کړي دي

                                               ځان نه را تاو کړي، دا غلط خیالونه و ریبو

         څو پوری به خپلو کې د جنګ شرم ته غاړه ږدو

                                               ځي چې ټول وطن نه، د نفاق تخمونه و ریبو

         څومره بې ننګي ده چې د بل دلاس آله واوسو

                                               خپل لاسونه یو کړو، دا پردي زواکونه و ریبو

         څو چې سوارې ئې شې نیزې تیري کوونکو ته

                                               دوۍ چې دي کرلي، دا اغزن ګلونه و ریبو

         دې و حشت ته غلی کښیناستل پخپله جرم دی

                                               ځي چې د عمل د لاس او پښو بندونه و ریبو

         قبر د شهید به کړو سنګر او شناخته ئې سپر ځانته

                                               تورو او نیزو ته به دا ټول توغونه و ریبو

         در س به د عبرت ورڅخه واخلو مستقبل ژوند ته

                                               ځمکې د ماضي نه به کره درسونه و ریبو

         دغه د تاریخ د آزموينې نوی دور دی

                                               پاڅیږئ زمرو چې د بري خوندونه و ریبو

۱۹۹۹/۵/۳

توجه!

کاپی و نقل مطالب از «اصالت» صرف با ذکر منبع و نام «اصالت» مجاز است

کلیه ی حقوق بر اساس قوانین کپی رایت محفوظ و متعلق به «اصالت» می باشد